Pritet takim koordinues VV – LDK për taksën 100%

Partnerët e koalicionit do të takohen brenda pak ditëve

Kryeparlamentarja Vjosa Osmani sot, në cilësinë e përfaqësueses së LDK-së si partner i koalicionit qeverisës me VV-në, ka thënë se konkretizimi i marrëveshjes së këtyre dy subjekteve për çështjen e tarifës 100%, është çështje ditësh.

Ajo është shprehur para gazetarëve se brenda dy apo tre ditëve të ardhshme do të zhvillohet takim koordinues mes LDK-së e VV-së për të marrë hapat e mëtejshëm rreth tarifës së vendosur ndaj mallrave serbe.

”Sa i përket konkretizmit të asaj marrëveshjeje dhe hapave që do të vijnë në ndërkohë, këto dy-tre ditë do të kemi takim koordinues dhe do të vendosen të gjithë hapat, qoftë nga aspekti kohor apo përmbajtjesor, lidhur me zbatimin e asaj marrëveshjeje që ka të bëjë me tarifën”, përcjell albinfo.ch.

”Pra, brenda pak ditësh do të jemi në gjendje për të zhvilluar takimin. Siç e kam potencuar, këtë përgjigjie s’po e jap në emër të Kuvendit, por si partner i koalicionit qeverisës, sepse ajo ështje çështje e Qeverisë së Kosovës dhe dy partive që janë pjesë e asaj qeverie”.

---