Shqipëria nis grumbullimin, Manaj dhe Ramadani: Synojmë vendin e parë në grup

Kombëtarja shqiptare ka nisur përgatitjet për katër ndeshjet e para të UEFA Nations League. Rey Manaj dhe Ylber Ramadani shprehen optimistë para sfidave të reja, duke theksuar se kuqezinjtë synojnë vendin e parë në grup, ndërsa objektivi madhor mbetet kualifikimi në Euro 2028

Kombëtarja e Shqipërisë ka nisur zyrtarisht grumbullimin për ndeshjet e radhës në UEFA Nations League, ndërsa në ditën e parë para mediave dolën Rey Manaj dhe Ylber Ramadani.

Dy futbollistët kuqezi folën në “Air Albania” për gjendjen e skuadrës, pritshmëritë nga ndeshjet e ardhshme dhe objektivat e Shqipërisë në këtë edicion të kompeticionit, raporton FSHF, transmeton albinfo.ch.

Manaj: Duhet të japim më të mirën

Rey Manaj pret një Shqipëri ndryshe nga ajo që u pa në dy ndeshjet miqësore të qershorit.

Sulmuesi kuqezi vlerëson se ato takime erdhën në një moment të vështirë, në fund të një sezoni të gjatë dhe pas zhgënjimit që skuadra kishte përjetuar nga mosarritja e objektivit të mëparshëm. Tani, sipas tij, situata është tjetër dhe skuadra duhet të tregojë potencialin e saj të vërtetë.

Manaj theksoi se në katër ndeshjet e ardhshme të gjithë futbollistët, pavarësisht repartit ku luajnë, duhet të japin maksimumin dhe të ndihmojnë skuadrën edhe në aspektin ofensiv.

Sulmuesi e bëri të qartë edhe objektivin për Nations League: Shqipëria dëshiron ta përfundojë grupin në vendin e parë.

Megjithatë, synimi kryesor afatgjatë mbetet edhe më i madh – rikthimi në Kampionatin Evropian. “Objektivi kryesor i yni është të arrijmë të futemi në Europian. Tani kemi Nations League, por objektivi ynë real është Europiani”, deklaroi Manaj.

Ai beson se ndeshjet e Nations League mund ta ndihmojnë Shqipërinë në rrugëtimin drejt këtij synimi, ndërsa vlerësoi edhe motivimin e trajnerit Rolando Maran dhe atmosferën brenda skuadrës.

Konkurrenca në sulm, Manaj: Është gjë e mirë

Manaj foli edhe për konkurrencën e madhe për një vend në repartin ofensiv.

Sipas tij, rivaliteti mes lojtarëve është pozitiv, sepse i mban të gjithë të motivuar dhe rrit nivelin e skuadrës.

Ai theksoi se te Kombëtarja secili duhet të mendojë për suksesin e ekipit dhe të dëshirojë që edhe bashkëlojtarët të paraqiten sa më mirë.

I pyetur për mungesat e Armando Brojës dhe Nedim Bajramit, Manaj nënvizoi se çdo futbollist që ftohet në Kombëtare ka cilësitë e veta dhe duhet të japë 100 për qind.

Ramadani: Ndaj Bjellorusisë duhet të hyjmë për të fituar

Edhe Ylber Ramadani e bëri të qartë se Shqipërinë e pret një ndeshje e vështirë ndaj Bjellorusisë.

Mesfushori kuqezi kërkon që skuadra të hyjë në fushë me seriozitet maksimal dhe me një mentalitet ndryshe nga ai i ndeshjeve të fundit miqësore.

Sipas Ramadanit, në futbollin e sotëm nuk ka më kundërshtarë të lehtë dhe çdo skuadër është në gjendje të krijojë probleme.

Pikërisht për këtë arsye, Shqipëria duhet të hyjë në fushë me objektivin e qartë për të marrë fitoren.

Presing i lartë me Maranin

Ramadani foli edhe për filozofinë taktike që trajneri Rolando Maran po përpiqet të implementojë te Kombëtarja. Sipas tij, tekniku italian ua ka bërë të qartë futbollistëve që nga fillimi se dëshiron një Shqipëri që ushtron presing të lartë dhe përpiqet ta vendosë kundërshtarin nën presion më afër portës së tij.

Përgatitja taktike ndryshon në varësi të kundërshtarit, ndërsa stafi analizon mënyrën se si Shqipëria mund ta befasojë ekipin përballë.

Ramadani: Luajta apo jo, rëndësi ka Shqipëria

Ylber Ramadani u pyet edhe për mundësinë që të jetë titullar në ndeshjet e ardhshme.

Mesfushori theksoi se vendimi i takon trajnerit dhe se për të më e rëndësishme është arritja e objektivit të skuadrës. Ai tha se do t’i mbështesë bashkëlojtarët pavarësisht nëse është në fushë apo në stol, duke nënvizuar se në Kombëtare grumbullohen lojtarët më të mirë dhe të gjithë duhet të jenë në shërbim të ekipit.

Objektivi: Kreu i grupit

Si Manaj, ashtu edhe Ramadani e kanë bërë të qartë ambicien e kuqezinjve për këtë edicion të Nations League: Shqipëria dëshiron vendin e parë në grup.

Skuadra e Rolando Maranit do të luajë katër ndeshjet e para ndaj Bjellorusisë, Finlandës dhe San Marinos, me këtë të fundit që do të përballet dy herë me kuqezinjtë.

Shqipëria e nis kështu një cikël të ri me synimin që paraqitjet në Nations League të shërbejnë edhe si një hap i rëndësishëm drejt objektivit madhor: kualifikimit në Euro 2028.

---