Mesazhi i BE-së për politikanët e Kosovës

Kosovës i duhet qëndrueshmëri dhe politikanët duhet të veprojnë me përgjegjësi

Bashkimi Evropian vlerësoi të enjten se Kosovës i duhet qëndrueshmëri dhe udhëheqësit politikë duhet të veprojnë me përgjegjësi në situatën e krijuar pas rrëzimit të qeverisë së kryeministrit Albin Kurti.

Zëdhënësja Ana Pisonero tha se mocioni i mosbesimit ndaj Qeverisë së Kosovës e ka vënë atë në situatë të vështirë në kohën e krizës së pashembullt të shkaktuar nga koronavirusi.

“Ajo që i duhet Kosovës është qëndrueshmëria dhe përqendrimi i përpjekjeve për të trajtuar krizën me koronavirusin dhe mbrojtjen e shëndetit të qytetarëve”, deklaroi ajo, transmeton Zëri i Amerikës.

Të gjithë udhëheqësit politikë duhet të veprojnë me përgjegjësi dhe në interes të qytetarëve të Kosovës, shkroi ajo, duke nënvizuar se “hapat e ardhshëm pas votimit të djeshëm duhet të jenë në pajtim me Kushtetutën e Kosovës”, përcjell albinfo.ch.

Parlamenti i Kosovës miratoi të mërkurën mbrëma mocionin e mosbesimit ndaj Qeverisë së Kosovës, që u hodh nga Lidhja Demokratike e Kosovës.

Mocioni pasoi shkarkimin e ministrit të Brendshëm nga radhët e saj, Agim Veliu, nga ana e kryeministrit Albin Kurti javën e kaluar, për shkak të mospajtimeve rreth deklarimit apo jo të gjendjes së jashtëzakonshme.

Qeveritë e Gjermanisë dhe Francës i kërkuan me herët gjatë javës Lidhjes Demokratike e Kosovës të rishqyrtojë vendimin për mocionin e mosbesimit. Përmes një letre proteste dërguar një ditë para seancës së Parlamentit, zëvendëskryeministrit Avdullah Hoti diplomatët e të dyja vendeve i kërkuan atij që të njoftojë kryetarin e LDK-së, Isa Mustafa, mbi shqetësimet e dy kryeqyteteve… dhe të rishqyrtojë vendimin për mocionin e mosbesimit…”

Ambasada amerikane mbështeti të martën ndërkaq caktimin e seancës për mocionin e mosbesimit.

---