Çfarë thuhet në notën verbale të Sierra Leones për çnjohjen e Kosovës

Një dokument i siguruar nga Radio Evropa e Lirë (RSE) në Ministrinë e Jashtme serbe thuhet se Qeveria e Sierra Leone ka vendosur të tërheqë njohjen e pavarësisë së Kosovës. Në dokumentin, në të cilin, megjithatë, nuk ka ndonjë nënshkrim, thuhet se Qeveria e Siera Leones po shikon me shqetësim bllokimin në marrëdhëniet midis Serbisë dhe Kosovës.

“Qeveria e Sierra Leone-s e ka konsideruar qëndrimin që çfarëdo njohje që ka ndodhur në lidhje me pavarësinë e Kosovës, ishte e parakohshme, duke pasur parasysh dialogun në vazhdim”, thuhet në dokument.

“Qeveria e Sierra Leone ka vendosur të tërheqë çdo njohje të tillë të pavarësisë së Kosovës, ndërsa pret një zgjidhje të pranueshme nga të dyja palët”, thuhet në dokument, përcjell albinfo.ch.

Të pyetur se kush është nënshkruesi i dokumentit, Ministria e Jashtme tha se bëhet fjalë për një “notë, e cila nuk nënshkruhet”. Në njoftimin nga takimi mes ministrit të Jashtëm serb, Ivica Daçiq dhe ministres së Sierra Leones, Nabeela Tunis, që është postuar në faqen e internetit të Sierra Leone, thuhet se takimi ishte përqendruar në forcimin e bashkëpunimit midis dy vendeve, pa e përmendur Kosovën.

Të martën, ministri i Punëve të Jashtme i Serbisë, Ivica Daçiq, tha se Sierra Leone e ka tërhequr njohjen e pavarësisë së Kosovës si shtet të pavarur. Ministri i Jashtëm i Kosovës, Glauk Konjufca, tha se ende nuk ka informacione zyrtare lidhur me pretendimet e Serbisë se Sierra Leone e ka tërhequr njohjen e pavarësisë së Kosovës.