Gjergjaj: kundërshtarit tim David Haye i kanë ikur vitet

Albinfo.ch ka zhvilluar një intervistë ekskluzive me Gjergjajn ku ai flet për seriozitetin e kësaj përballjeje mjaft të vështirë për të

Vetëm edhe pak orë na ndajnë nga meçi i shumëpritur i boksit profesionist mes shqiptarit Arnold Gjergjaj dhe anglezit David Haye.

Albinfo.ch ka zhvilluar një intervistë ekskluzive me Gjergjajn ku ai flet për seriozitetin e kësaj përballjeje mjaft të vështirë për të.

Kjo luftë do të tregojë se në cilin nivel të boksit botëror mund t’i shtrijë dorëzat kobra shqiptare, Arnold Gjergjaj.

Albinfo.ch: Cila është tani forma juaj fizike për këtë meç?

Arnold Gergjaj: Jam përgatitur shumë mirë. Ndjehem shumë mirë e jam shumë i motivuar që boksoj ndaj një boksieri shumë të njohur e shumë të mirë, i cili ka qenë kampion bote.

Albinfo.ch: Jeni i bindur se do të fitoni kundër një boksieri që ka qenë kampion bote?

Arnold Gergjaj: Po, po! Unë kam një mendje shumë të mirë që do të shkoj atje dhe do të fitoj.

Albinfo.ch: Çfarë strategjie ke, ta fitosh meçin më herët përmes nokautimit apo do të luftosh me kujdes deri në fund që t’i marrësh pikët?

Arnold Gergjaj: Jo, jo, unë kam ushtruar, jam përgatitur për të gjitha raundet dhe në qoftë se vjen një rast për K.O. për mua do të jetë edhe më mirë, por me rëndësi që unë të jem i përgatitur për 10 raunde e të jem gjithnjë i koncentruar.

Albinfo.ch: Sa kohë i keni kushtuar deri më tani këtij meçi, si ka qenë orari i stërvitjeve tua?

Arnold Gergjaj: Ka dy muaj që kam nisur përgatitjet me dy deri në tri herë në ditë ushtrime. Nganjëherë bile kam bërë deri në tetë orë ushtrime.

Albinfo.ch: Kundërshtari vjen në ring me një përvojë shumë të madhe. A e keni analizuar luftën e tij?

Arnold Gjergjaj: Po unë e kam parë shumë herë në ring kundërshtarin tim David Haye, kam analizuar çdo video të tij me kundërshtarët që ka pasur në ring dhe si ka boksuar. Mund të them se e njoh çdo lëvizje të kundërshtarit tim.

Albinfo.ch: A mund të na tregosh cilat janë dobësitë e tij që ju keni vërejtur tek ai?

Arnold Gjergjaj: Dobësitë e tij në ring janë se ai është në një moshë më të vjetër se unë, kurse unë jam ai djali që vjen në ring me plotë motivim e që do të arrijë në kulmin e boksit botëror.