Rumunët i gëzohen lëndimit të Sadikut

Sulmuesi i Kombëtares shqiptare, Armando Sadiku do të mungojë për Zurichun në ndeshjen e Ligës së Evropës kundër Steauas së Bukureshtit

Rumunët ende nuk e kanë harruar sulmuesin kuqezi Armando Sadiku, i cili shënoi golin e vetëm në përballjen Shqipëri-Rumani në Kampionatin Evropian në Francë, shkruan albinfo.ch.

“Armando Sadiku, makthi i Rumanisë në Evropian do të mungojë ndaj Steauas së Bukureshtit në Ligës së Evropës”. Ky është titulli i përzgjedhur nga portali “Sport Total”, që e konsideron një lajm shumë të mirë për Steauan faktin që kjo skuadër nuk do të ketë përballë sulmuesin kryesor të Zyrichut në raundin e tretë të ndeshjeve në këtë garë.

Mediat rumune gjithashtu shkruajnë se Sadiku mungoi edhe me Shqipërinë në dy ndeshjet eliminatore të Botërorit “Rusi 2018” ndaj Lihtenshtajnit dhe Spanjës dhe është ende herët që ia të kthehet në fushë.

Steauas i duhet patjetër fitorja në Bukuresht ndaj skuadrës zvicerane nëse dëshiron të jetë në garë për një nga dy vendet e para në grup, pasi aktualisht renditet e fundit me vetëm një pikë.