Tringa Haxhiu përfundon me notën maksimale Masterin në të Drejtën Ndërkombëtare Biznesore në Universitetin e Vjenës

Pas studimeve të suksesshme në Fakultetin Juridik të Universitetit të Prishtinës, ajo vijoi specializimin në programin “European and International Business Law” në Universitetin e Vjenës

Tringa Haxhiu ka përfunduar me sukses studimet master në Universitetin e Vjenës, duke u pajisur me gradën Master në të Drejtën Ndërkombëtare Biznesore dhe duke diplomuar me notën maksimale, transmeton albinfo.ch.

Rrugëtimi i saj akademik në fushën e drejtësisë nisi në Kosovë, ku përfundoi me sukses të dalluar studimet në Fakultetin Juridik të Universitetit të Prishtinës.

 

 

Pas përfundimit të studimeve universitare, Haxhiu vazhdoi rrugëtimin akademik në Austri, në Universitetin e Vjenës, ku u përzgjodh për programin master “European and International Business Law”, të fokusuar në çështjet e së drejtës evropiane dhe ndërkombëtare në fushën e biznesit.

Përfundimi i këtij programi me notën maksimale përbën një tjetër arritje në formimin e saj profesional dhe akademik, duke e konsoliduar profilin e saj në një fushë të specializuar të drejtësisë.

 

 

Suksesi i Tringa Haxhiut përfaqëson një tjetër shembull të të rinjve shqiptarë që zhvillojnë karrierën akademike dhe profesionale në institucione universitare evropiane./Albinfo.ch

 

---