Presidenti Parmelin në fjalën e Vitit të Ri: “Ne nuk do të dorëzohemi”

"Vendi tani duhet të qëndrojë së bashku. Për shëndetin tonë dhe mirëqenien ekonomike, për paqen dhe solidaritetin, për lirinë dhe pavarësinë"

Në fillim të Vitit të Ri presidenti i Federatës së Zvicrës, i cili posa ka marrë detyrën “nuk dëshiron të shprehet tepër optimist”. Kështu ka thënë Guy Parmelin në fjalimin e tij të Vitit të Ri, të publikuar sot, e premte, më 1 janar 2021.

“Shumëçka është e pasigurt dhe situata mbetet e pasigurt”, ka thenë ai. Sidoqoftë, presidenti ndjen se megjithatë  zviceranët kanë “njëfarë besimi”, transmeton albinfo.ch.

Zvicra ka bërë shumë gjëra të qëlluara në të kaluarën, sipas Presidentit Federal: “Ne kemi sjellë shpikje të shumta në treg”.

Parmelin në fjalën e tij më tutje kujtoi se shumë familje kishin humbur të afërmit nga kriza e pandemisë dhe se personeli në spitale dhe shtëpi ishin në kufi të forcës së tyre.

Por, “vendi tani duhet të qëndrojë së bashku. Për shëndetin tonë dhe mirëqenien ekonomike, për paqen dhe solidaritetin, për lirinë dhe pavarësinë – me pak fjalë: për gjithçka që ka qenë prej kohësh e dashur për ne”.

Guy Parmelin merr detyrën e Presidentit Federal nga Këshilltarja Federale Simonetta Sommaruga. Mandati i këtij funksioni është një vit.

 

---