Me 20 euro nën dorë, kalon pikën kufitare drejt vendeve të BE-së

Nisja u bë në Tiranë dhe pothuajse të gjithë pasagjerët në autobus ishin të një moshe relativisht të re

Nuk janë të paktë as personat që janë kthyer nëpër këto pika doganore nga policia me pretendime nga më të ndryshmet.

Por kjo gjë mund të ndryshojë nëse paguan minimalisht 20 euro. Kjo ka ndodhur në pikën kufitare të Muriqanit , ku pas disa denoncimeve të të rinjve Fiks Fare udhëtoi për të zbuluar të vërtetën.

Gazetarët e Fiks Fare ndoqën rrugëtimin me një linjë autobusi me destinacion përfundimtarë qytetin e Vienës në Austri.

Nisja u bë në Tiranë dhe pothuajse të gjithë pasagjerët në autobus ishin të një moshe relativisht të re.

Bashkëpunëtorët interesohen në një agjenci udhëtimesh për ditën dhe orarin e nisjes së autobusëve drejt Vienës. Në agjenci pyesin nëse në pikën kufitare kur të kalojnë duke mos pasur letër garanci a mund t’i kthejnë apo jo, por punonjësi i agjencisë u përgjigjet se nuk kanë për t’i penguar. ” Marrin kudo nëpër dogana ryshfet, i thotë polici vetë shoferit mblidhi nga 5 euro secilit” shprehet punonjësi.

Por nga biseda me pasagjerët bashkëpunëtorët e Fiksit kuptuan se kjo mënyrë kalimi, pra me ryshfet nëpër pikat doganore është më se normale. Me të mbërritur në pikën doganore të Muriqanit , polici hipën në autobus dhe i nxjerrë të gjithë pasagjerët jashtë tij.

Pas kalimit të kontrollit të pasaportave më shumë se gjysmës së pasagjerëve, të gjithë të rinj në moshë, u është mbajtur pasaporta në sportel dhe nuk u është vulosur. Në këto momente vjen shoferi i autobusit i cili të gjithë pasagjerëve që nuk u është vulosur pasaporta i kërkon nga 20 euro.

Këtë ryshfet e kërkon punonjësi i policisë që t’u vulosi pasaportat e më pas të vazhdojnë rrugëtimin. Në pamjet e transmetuara në Fiks Fare duket qartë se si shoferi i autobuzit u thotë të mbledhin eurot pasagjerëve e më pas ai do i vendosi në pasaportë dhe do shkojë t’ia japi policit në pikën kufitare.

Shoferi personave që kanë bërë pagesën prej 20 euro u thotë të hypin në autobus që me vulosjen e pasaportave pas dhënies së ryshfetit të nisen. Por kalimi në këtë lloj mënyre u jep dorë edhe shumë personave të cilët duan të kërkojnë azil. Një prej tyre ishte edhe një qytetar nga Lezha i cili pas dy vjetësh do të shkonte sërish në Gjermani ku do të aplikonte për azil.

Ai i tregon në një bisedë bashkëpunëtorit të Fiksit se kjo ishte hera e dytë që do kërkonte azil në Gjermani dhe tashmë ishte pajisur edhe me dokumentacionin e duhur që askush nga shteti gjerman nuk do mund ta largonte.

Ai herën e parë kishte aplikuar pasi ishte në gjak në Shqipëri se kishte plagosur dikë. Më tej ai shprehet se ka marrë letër nga policia, edhe nga prokuroria dhe gjykata. Në të gjitha hallkat thotë se ka paguar ” prokurorit Arben Agovi i kam dhënë 500 euro për të ma dhënë letrën, ashtu siç duhet. Po edhe gjykatësin e kam paguar ama tani nuk po më vjen emri”, tha ai.

Punonjësi i agjencisë – Nuk ka me i thënë gjë njeri, nuk është çuni i ri 20 vjeç po shkon me shit drogë. Ça janë të gjithë këto të lodhur i len me kalu, dëm nuk bëjnë kujt thonë shkojnë për punë krahu.

 

---