I kërkuar nga Kosova dhe Shqipëria, Lutfi Dalipi ftohet nga Zvicra U21

Futbollisti 20-vjeçar Lutfi Dalipi është ftuar për herë të parë në Përfaqësuesen U21 të Zvicrës, pas paraqitjeve të mira këtë sezon me Vaduzin në Superligën zvicerane.

Përzgjedhësi i Zvicrës U21, Alex Frei, ka publikuar të enjten listën prej 25 futbollistësh për tri ndeshjet e fundit të fazës kualifikuese për Kampionatin Evropian U21. Në mesin e të ftuarve për herë të parë është edhe Lutfi Dalipi, përcjell albinfo.ch.

Zvicra fillimisht do të përballet me Luksemburgun më 25 shtator në Lugano, ndërsa më 29 shtator do të luajë në udhëtim kundër Islandës. Ndeshjen e fundit të kësaj faze do ta zhvillojë më 6 tetor në Francë.

Dalipi luan këtë sezon për Vaduzin, ku është i huazuar nga Young Boys. 20-vjeçari ka shënuar tri gola dhe ka dhënë shtatë asistime në shtatë ndeshjet e para të sezonit në Superligën zvicerane. Më herët ai ka zhvilluar gjashtë ndeshje me Zvicrën U20 dhe tri me U18.

Futbollisti i lindur në Zvicër ka qenë në vëmendjen e Shqipërisë dhe Kosovës. Sipas raportimeve të mediave në Prishtinë, Federata Shqiptare e Futbollit e ka kontaktuar për mundësinë e aktivizimit me Kombëtaren A, ndërsa kontakte ka pasur më herët edhe nga Kosova. Babai i Dalipit është nga Presheva, ndërsa nëna e tij nga Portugalia.

Në listën e Zvicrës U21 janë edhe futbollistët me prejardhje shqiptare Labinot Bajrami, Samuel Krasniqi dhe Dorian Derbaci. Bajrami dhe Derbaci rikthehen në ekip për këto ndeshje.

---