FIFA dënon Shqipërinë dhe Kosovën

Shqipëria është dënuar me 50 mijë franga, derisa Kosova me 30 mijë. Kjo është hera e parë që dënohet Kosova

FIFA nuk ka qenë aspak e mëshirshme për Shqipërinë dhe Kosovën, duke i dënuar për ndeshjet e tetorit, shkruan albinfo.ch.

Në vendimin e marrë nga Komisioni i Disiplinës, theksohet se Shqipëria gjobitet me 50 mijë franga zvicerane dhe në komunikatë nënvizohet se vendimi është marrë për dy ndeshje.

Bëhet fjalë për sfidat kundër Lihtenshtajnit dhe Spanjën pasi tifozët shqiptarë hodhën sende në fushën e lojës. Ndeshja e parë është ajo kundër Lihtenshtajnit. Sipas FIFA-s, bëhet fjalë për hedhjen e sendeve piroteknike dhe në bazë të artikullit 67 të kodit disiplinor, Shqipëria gjobitet me 25 mijë franga. Edhe për takimin kundër Spanjës, Federata Shqiptare gjobitet për të njëjtën arsye me 25 mijë franga dhe paralajmërohet në rast të përsëritjes së sjelljeve të tilla.

Nëse ngjarje të tilla regjistrohen edhe në sfidën e 12 nëntorit kundër Izraelit, atëherë Kombëtarja shqiptare rrezikon shumë që sfidën pasardhëse në vendin tonë ta luajë pa tifozë.

Në vendimin e marrë nga FIFA nuk ka shpëtuar as Kosova që është gjobitur me 30 mijë franga për koret e tifozëve, hedhjen e sendeve në fushë dhe banerat e shpalosur në stadiumin “Loro Boriçi” për sfidën kundër Kroacisë.