Etrit Berisha po dëshmon vlerat e tij

Etrit Berisha po dëshmon se padrejtësisht ishte zgjedhja e dytë te Lazio, duke treguar vlerat e tij në Atalanta

Portieri i Kombëtares shqiptare, Etrit Berisha vazhdon të tregojë vlerat me ekipin e tij, Atalanta. Falë pritjeve të shumta të bëra nga gardiani i portës kuqezi, Atalanta arriti të marrë një pikë me mjaft vlerë në sfidën e vështirë ndaj Fiorentinas, shkruan albinfo.ch.

Me këtë pikë të marrë në barazimin pa gola në stadiumin “Artemio Franchi”, Atalanta e Berishës shkon në kuotën e dhjetë pikëve, pas tetë ndeshjeve të zhvilluara në kampionatin italian.

Pritjet e Berishës në këtë ndeshje janë vlerësuar edhe nga mediat italiane, të cilat e kanë vlerësuar si një nga më të mirët në fushë për Atalantën.

“Sportmeadiset” e ka vlerësuar me notën më të lartë për lojtarët e kësaj ndeshjeje, 6.5, duke komentuar se është i sigurt e vendimtar në ndërhyrje dhe pa të meta.

Javën e ardhshme Atalanta do të pret skuadrën e Interit, ku Berisha gjithashtu mund të tregojë vlerat e tij përballë sulmit zikaltër.

Portieri prishtinas është i padiskutueshëm edhe në Kombëtaren shqiptare.