Futbollistët dhanë maksimumin në fushë

Edhe pse humbën me rezultat 3:0, angazhimi i futbollistëve kosovarë nuk mungoi, ndërsa në disa raste edhe fati ia ktheu punën

Përzgjedhësi i Kosovës, Albert Bunjaki ka thënë se nuk kishin fat ndaj Ukrainës, një skuadër shumë e fortë, shkruan albinfo.ch.

“Ka qenë një lojë e mirë e jona. Nuk patëm fat. Miloti kishte shans për të shënuar pastaj ata na ndëshkuan. Pas shtyllës së Bernard Berishës prapë na ndëshkuan. Kundërshtarëve nuk u nevojitën shumë raste për të na ndëshkuar. Mund të them se nuk patëm fat. Kemi qenë më të organizuar në mbrojtje, e dinim që goli i parë do të ishte domethënës. Luajtëm të disiplinuar, jemi munduar të jemi të drejtpërdrejtë me Muriqin. Kjo është eksperiencë e re për ne. Dy ndeshje me Kroacinë dhe Ukrainën ishin shumë e vështirë. Sapo kemi nisur rrugën tonë, është reale që të ndodhin këto rezultate. Më gëzon fakti që krijojmë raste, 7 kundër Kroacisë por edhe ndaj Ukrainës”, theksoi trajneri i Kosovës.

Ndërkohë, mbrojtësi Amir Rrahmani u shpreh se kishin disa raste, por nuk i konkretizuan. “Pjesa e parë ishte e mirë, e dinim që do të ishte ndeshje e vështirë. Ishte një goditje që na dënoi, teksa një aksion më parë Rashica kishte mundësi për të shënuar. Jemi ekip i vogël duhet t’i shfrytëzojmë rastet. Edhe te goli i dytë ne kishim mundësi për të shënuar, ndoshta ishim të pafat. Gjuajtjet nga larg na ndëshkuan”, deklaroi Rrahmani.