Futbollisti padit klubin, pasi nuk ia siguroi lejen e punës

Ervin Kurti ka kërkuar që klubi të paguajë tarifën prej 280 euro, si dhe pagesat për pagat që nuk i janë paguar

Foto ilustrim

Një futbollist shqiptar ka paraqitur një protestë gjyqësore kundër skuadrës nga Malta, Gudja United, duke pretenduar se nuk kishin aplikuar për lejen e tij të punës, kanë bërë të ditur mediat malteze.

Protesta është paraqitur në sallën e parë të Gjykatës Civile nga avokati Malcolm Mifsud kundër George Grech dhe Gordon Grech, si përfaqësues të klubit.

Futbollisti Ervin Kurti kishte mbërritur në Maltë më 27 qershor të vitit të kaluar për t’u bashkuar me klubin e futbollit dhe ishte stërvitur një vit me këtë skuadër.

Kur ai kishte nënshkruar kontratën me klubin e tij, Kurtit i është kërkuar që të paguajë një tarifë prej 280 euro nga drejtuesit e klubit për të kërkuar lejen e punës.

Ai pohon se pasi punësimi i tij ishte ndërprerë për shkak të një dëmtimi të rëndë kokë që pësoi në korrik të këtij viti gjatë një seance stërvitje, ai u detyrua të largohet nga vendi për shkak se klubi nuk kishte arritur të merrte lejen e punës.

Kurti ka kërkuar që klubi të paguajë tarifën prej 280 euro, si dhe kompensimin për pagat që nuk i janë paguar.