Zvicra mbështet komunën e Kaçanikut

Qeveria zvicerane vitin e ardhshëm do ta bëjë qytetin e Kaçanikut me plan rregullues urbanistik. “Ky projekt do të realizohet me mjete të programit “Përkrahja e qeverisjes lokale dhe e decentralizimit – LOGOS”, që financohet nga Qeveria zvicerane”, ka theksuar Hajrush Dullovi, zëdhënës i Komunës, të dielën.

Sipas tij, edhe Komuna e Kaçanikut do të participojë me një shumë mjetesh për realizimin e projektit.  Pohimet e tij i ka konfirmuar Fikri Vërbani, drejtor i Drejtorisë së Financave, Ekonomisë dhe Zhvillimit. “LOGOS-i i ka lejuar 50 mijë euro për hartimin e Planit rregullues të Kaçanikut, ndërsa Komuna 20 mijë euro”, ka thënë ai.

Programi “Zvicër-Kosovë – Përkrahja e qeverisjes lokale dhe e decentralizimit – LOGOS” financohet nga qeveria zvicerane nëpërmjet Zyrës zvicerane për bashkëpunim në Kosovë (SCO), ndërsa zbatohet nga fondacioni zviceran “Intercooperation”.