Vanesa, sërish në garë për këngëtaren më të mirë të Gjermanisë

Në vitin 2008, ajo kishte mbërritur deri në finalen e garës për talentin më të madh të Gjermanisë “Supertalent”

A ju kujtohet Vanesa Krasniqi? Vajza që, në moshën 13 vjeçare, në vitin 2008, në një konkurrencë të ashpër kishte mbërritur deri në finalen e garës për talentet më të mëdhenj muzikorë të Gjermanisë “Supertalent”?.

Ajo, me zërin e saj të fuqishëm dhe me talentin e rrallë interpretues, pati entuziazmuar edhe dy anëtarët e jurisë, Dieter Bohlen dhe Bruce Darnell. Ata e kishin shpallur madje si “zërin më të bukur të Gjermanisë, për moshën e saj”.

Vanesa kishte lënë përshtypje veçanërisht me interpretimin e këngës së Kelly Clarkson “Because of you”.

Pastaj, meqë nuk ia doli të zgjidhej e para (doli e katërta, në finale), nuk kemi dëgjuar shumë për të. Ndërkohë, ajo është rritur, ka mbushur 16 vjet dhe sërish i ka hyrë garës për këngëtaren më të mirë të Gjermanisë.

Kësaj here, Vanesa do të marrë pjesë në spektaklin DSDS (Gjermania kërkon superstarin), ku jurinë sërish e përbëjnë Dieter Bohlen dhe Bruce Darnell.

Sipas medieve gjermane, Vanesa Krasniqi gjatë kësaj kohe nuk ka qëndruar duarkryq. Ajo ka kënduar në shumë koncerte dhe ka zhvilluar më tutje teknikën e këndimit. Natyrisht, do ta ketë shumë vështirë të çajë përpara, kur dihet se konkurron krahas 35.000 të rinjve e të rejave nga Gjermania që ëndërrojnë të bëhen këngëtarë-e.

Spektakli garues DSDS fillon këtë shtunë (nesër) më 7 janar, në orën 20.15 në kanalin RTL. Vanesës i urojmë paraqitje sa më të mirë. Për fillim.