Shqiptarët e Leposaviqit, peng i barrikadave serbe

Qarkullimi në fshatrat e Shalës së Bajgores është vështirësuar pasi që serbët e Leposaviqit kanë bllokuar rrugën Mitrovicë – Leposaviq, në afërsi të Rudares

Fshatrat shqiptare që jetojnë në komunën e Leposaviqit janë vënë në siklet të madh për shkak të bllokimit të rrugëve nga ana e serbëve. Për të ardhur deri në Mitrovicë banorëve të fshatrave, Koshtovë, Cerajë dhe Bistricë, u duhet të kalojnë disa kilometra rrugë. 

Gjendja e qarkullimi për këto fshatra të Shalës së Bajgores, është vështirësuar pasi që serbët e Leposaviqit të pakënaqur me vendosjen e taksave kufitare, kanë bllokuar rrugën Mitrovicë – Leposaviq, në afërsi të Rudares.

“Për shkak të pengesave në rrugë ata të premten janë detyruar që të lëvizin nëpër Zveqan, mandej nëpër Lagjen e Boshnjakëve për të arritur në Mitrovicë”, deklaroi Ahmet Jashari, zëdhënës i Komunës së Mitrovicës.  

Sipas tij, banorët e këtyre fshatrave, transportin e kanë falas, mirëpo rrugën nuk e kanë të sigurt. 

Përfaqësuesi i banorëve të Cerajës, Lulzim Hetemi, thotë se kështu ndodhë gjithmonë kur serbët e veriut rebelohen.

“Deri para tre ditësh kemi udhëtuar nëpër magjistralen Mitrovicë, Luginës së Ibrit. Autobusi qarkullon tre herë në ditë, në ora 07:00, 12:00 dhe në 02:00 ora. Me 24 në mëngjes i kemi pa barrikadat në udhëkryqin Zveçan-Rudare. Pas vënies së barrikadave në Rudare jemi duke udhëtuar nëpër lagje, Mahallë të Boshnjakëve për Zveqan”, thotë Hertemi.

Sipas tij, banorët që udhëtojnë me këtë autobus janë të frikësuar, meqë duhet të lëvizin nëpërmjet rrugicave në vendbanimet serbe. Banorët sipas Hetimit, djehen të rrezikuar edhe pse nuk kanë pasur ndonjë problem. 

“Neve na përcjell që pesë gjashtë muaj ditë policia e komunitetit serb. Shumë herë kemi probleme edhe me ta meqë duhet me i prit gjysmë ore ose 40 minuta. Para pesë dite në mbrëmje s’kanë ardhur hiq. U ardh vozitësi vetëm, i kanë fol edhe këta në Mitrovicë meqë ka  rrezikuar. Në mbrëmje atje problem me prit me familje e me fëmijë”, tha ai.

Banorët e këtyre fshatrave në thellësi të veriut të Kosovës ankohen edhe për mosmbështetje sa duhet nga institucionet kosovare. Në radhë të parë përmendin nevojën për rregullimin e një rruge malore që i lidh me Mitrovicën e cila tashmë është bërë e pakalueshme.