Shaqa përmirëson gabimin

KF Bazeli ka fituar ndeshjen kampionale kundër ekipit të Sionit, me rezultat 1:0, falë golit të vetëm që shënoi Xherdan Shaqiri në minutën 61’ dhe tani ka katër pikë diferencë në vendin e parë, në krahasim me rivalin nga Zurichu.

Pas kartonit të kuq në Ligën e Evropës kundër Spartakut nga Moska, Shaqiri u bë objekt i kritikave të ashpra, ndërsa të dielën ai i demantoi të gjithë ata që menduan se Shaqirit iu ka rritur mendja. Nënëtëmbëdhjetëvjeçari luajti me një përkushtim të madh, sa për dy lojtarë duke dëshmuar se bëhet fjalë për një super talent.

Në minutën 61’, pas një topi të marrë nga Stocker, Shaqiri nuk i la asnjë rast portierit të mysafirëve që të dëshmohet, duke shënuar golin vendimtar të fitores. Edhe në minutën 75’, “Shaq Attack” siç e quajnë mediat zvicerane, kishte një rast të mirë për të shënuar por nuk kishte fat.

Në minutën 80’, stadiumi “Jakob Park” në Bazel jehoi për një kohë të gjatë nga duartrokitjet që iu dedikuan Shaqës, pas zëvendësimit të tij. Me siguri se loja e shkëlqyeshme e Xherdanit i ka lënë mbresa edhe selelsionuesit zviceran Ottmar Hitzfeld, i cili ndeshjen e përcillte nga tribunat e stadiumit.

Gjatë gjithë ndeshjes, lojë të mrrekkullueshme ka treguar edhe Granit Xhaka, i cili në fushë të gjelbër ishte për 90 minuta.