Rritje rrogash në Kosovë

Përfaqësues të Zyrës Civile Ndërkombëtare në Kosovë, thonë se institucionet kosovare kanë në dorë planifikimin për rritje pagash dhe shpenzimesh nga buxheti i Kosovës, mirëpo ato duhen bërë në marrëveshje me FMN.

Kryeministri i Kosovës në largim Hashim Thaçi, pak para zgjedhjeve mori disa vendime për rritjen e pagave të punonjësve në Kosovë, atyre që paguhen nga buxheti i Kosovës.

Këto vendime për rritje pagash, sipas kryeministrit Thaçi, do të hyjnë në fuqi nga janari i vitit të ardhshëm. Rritja e pagave do të përfshijë arsimtarët e shkollave fillore dhe të mesme, administratën shtetërore dhe policinë.“Ne kemi bërë shumë investime kapitale gjatë tri vjetëve të shkuara, ndërsa tash jemi zotuar që të rrisim mirëqënien e qytetarëve dhe në kuadër të kësaj, kjo nënkupton rritjen e përgjegjësive për pagat e të gjithë të punësuarve në Republikën e Kosovës.

Ky zotim është vendim”, thotë kryeministri Thaçi. Ndërkohë zëdhënësi i Zyrës Civile Ndërkombëtare, Kai Muler Berner, zyrë kjo e cila mbikëqyr pavarësinë e Kosovës, i tha DW-së nëpërmes postës elektronike se është në dorë të institucioneve të Kosovës që të marrin angazhime për shpenzime publike. Mirëpo, kjo zyrë i tërheq vërejtjen qeverisë së Kosovës që të ketë parasysh marrëveshjen me FMN, e cila specifikon qartë se çdo planifikim për rritjen e të ardhurave dhe shpenzimeve, duhet bërë duke ulur diku tjetër shpenzimet.

Ekspertët e ekonomisë, thonë se pagat e punonjësve kosovare mund të rriten deri në një masë të vogël edhe pse mundësitë janë mjaft të kufizuara.