Pacolli zgjidhet president i Kosovës

Është dashur raundi i tretë i votimit që Pacolli të zgjidhej president i Kosovës. Ai ka qenë kandidati i vetëm, i nominuar për këtë post

Nga 67 deputetë të pranishëm në seancë, Pacolli, në raundin e tretë mori 62 vota. Për zgjedhjen në këtë post do të mjaftonin 61 vota. Kundër zgjedhjes së Pacollit ishin katër dhe një votë ishte e pavlefshme.

Në raundin e parë për Pacollin kanë votuar 54 deputetë, kundër kanë qenë 11, ndërsa dy vota ishin të pavlefshme.

Ndërsa në raundin e dytë nga 67 deputetë që kanë votuar, për Pacollin kanë votuar 58 deputetë, kundër kanë qenë shtatë, ndërsa dy vota ishin të pavlefshme.

Me zgjedhjen e tij u evitua kriza institucionale që mund të kaplonte Kosovën, ngase nëse nuk do të zgjidhej presidenti, atëherë, në bazë të Kushtetutës, ushtruesi i detyrës së presidentit duhej të shpallte zgjedhje të reja, që duhej të mbaheshin brenda 45 ditëve.