Gërvalla: Dialogu duhet të çojë në njohjen reciproke, BE-ja të bëjë veprime ndaj Serbisë

Foto FB: Donika Gërvalla

Në takimin e Ministrave të Jashtëm të Bashkimit Evropian të mbajtur në Luksemburg, Zëvendëskryeministrja dhe Ministrja e Punëve të Jashtme dhe Diasporës e Republikës së Kosovës, Donika Gërvalla, kërkoi mbështetje të qartë për aspiratat euroatlantike të Kosovës, duke theksuar se është koha për veprim konkret nga partnerët ndërkombëtarë, shkruan albinfo.ch.

Ministrja Gërvalla theksoi rëndësinë që integrimi i Kosovës në Bashkimin Evropian dhe NATO ka jo vetëm për vendin, por për të gjithë rajonin dhe sigurinë evropiane në tërësi. Ajo prezantoi tri hapa urgjentë që sipas saj janë vendimtarë për stabilitetin në Ballkanin Perëndimor: Heqja e masave ndëshkuese të BE-së ndaj Kosovës; përfundimi i procesit të anëtarësimit të Kosovës në Këshillin e Evropës; mbështetja për aplikimin e Kosovës për anëtarësim në BE.

Gërvalla rikonfirmoi përkushtimin e Qeverisë së Kosovës ndaj dialogut të lehtësuar nga BE me Serbinë, si dhe zbatimit të marrëveshjeve të arritura në Bruksel dhe Ohër më 2023. Ajo nënvizoi se njohja reciproke dhe ndërtimi i marrëdhënieve të fqinjësisë së mirë mbeten synim i domosdoshëm i këtij procesi. Në këtë kontekst, ajo kërkoi që BE të marrë masa ndaj Serbisë, e cila, siç tha ajo, vazhdon të refuzojë marrëveshjet dhe vepron kundër frymës së dialogut, shkruan albinfo.ch.

Në dritën e zhvillimeve të fundit në rajon, përfshirë ndikimin rus dhe kërcënimet e vazhdueshme nga Serbia, Gërvalla bëri thirrje për mbështetje të fuqishme për anëtarësimin e Kosovës në NATO. Ajo kërkoi gjithashtu llogaridhënie për sulmin në Banjskë, duke e cilësuar si një akt të hapur agresioni që kërcënon sigurinë rajonale dhe stabilitetin evropian.

“Koha për veprim është tani. Mbështetja për Kosovën është investim për paqe, siguri dhe demokraci në gjithë Evropën,” deklaroi ministrja Gërvalla në përfundim të fjalimit të saj, shkruan albinfo.ch.