Dardan Nuhiu kryeson Inteligjencën Financiare

Bordi Mbikëqyrës i Njësisë së Inteligjencës Financiare të Kosovës (IFK) në takimin e mbajtur të martën, në mënyrë unanime emëroi Dardan Nuhiun drejtor të Njësisë së Inteligjencës Financiare të Kosovës. Ai ishte i propozuari nga komisioni për vlerësimin e kandidatëve të cilët kanë aplikuar për këtë pozitë.

“Sipas komisionit, pas përzgjedhjes së kandidatëve të përshtatshëm për pozitën e drejtorit të Njësisë së Inteligjencës Financiare të Kosovës, duke i marrë parasysh kushtet ligjore që kërkohen për pozitën e shpallur, Dardan Nuhiu i plotëson kushtet për t’u propozuar për emërim në pozitën e Drejtorit të Njësisë së Inteligjencës Financiare të Kosovës”, thuhet në komunikatën e Zyrës për informim të Ministrisë së Financave.

Nuhiu, sipas komunikatës është ekonomist i diplomuar, “posedon njohuri të mira të legjislacionit për parandalimin e shpëlarjes së parasë, ka njohuri rreth trendëve të zhvillimit të politikave dhe dokumenteve të tjera për zhvillimin e Njësisë, sipas praktikave më të mira evropiane”.