Prijnë mërgimtarët e Zvicrës për aksidente në komunikacion

Vetëm gjatë 24 orëve të fundit në Prizren kanë ndodhur 16 aksidente trafiku, ndërsa në shumicën e raste janë përfshirë bashkatdhetarët nga Zvicra

Bashkatdhetarët kosovarë që kanë ardhur për pushime në vendlindje, po mundohen ta “shfrytëzojnë” maksimalisht lirinë e atdheut. Kufizimet që ua bën shteti zviceran për vozitje të shpejtë, ata po mundohen t`i kompensojnë nëpër udhët e dëmtuara të Kosovës, dhe në shumë raste janë ata shkaktar të aksidenteve në komunikacion.

Vetëm gjatë 24 orëve të fundit në Rajonin e Prizrenit kanë ndodhur 16 aksidente të trafikut, në të cilat janë lënduar 18 persona dhe është shkaktuar dëm i madh material.

Sipas hetuesve të aksidenteve të trafikut, thuhet se numri më i madh i pjesëmarrësve në aksidente janë nga radhët e kurbetçinjve, kryesisht atyre zviceranë. Sa për ilustrim, në këtë raport thuhet të jenë të përfshira 14 automjete me targa të huaja, dominojnë ato nga Zvicra.

Drejtoria Rajonale e Policisë në Prizren e mirëpret ardhjen e bashkatdhetarëve tanë në pushime, por dëshiron që ata të sjellin kulturën në respektimin e rregullave të trafikut nga shtetet prej nga vijnë. Mirëpo, në Prizren, në kohën kur nuk ka mërgimtarë, ka edhe aksidente shumë të rralla.

Në anën tjetër Policia e Kosovës raporton se gjatë 24 orëve të fundit kanë ndodhur 73 aksidente pa të lënduar, 29 aksidente me të lënduar dhe një aksident me fatalitet. Por ajo që është më tragjike, të hënën në aksin rrugor Prishtinë-Podujevë, ka ndodhur një aksident i rëndë me 4 persona të vdekur.