Gjermani: Dy të vdekur nga sulmi me thikë në Aschaffenburg

Një sulm me thikë në qytetin jugor të Gjermanisë, Aschaffenburg, ka lënë të vdekur dy persona të mërkurën, tha policia lokale.

Një burrë 41-vjeçar dhe një djalë dyvjeçar vdiqën në sulm. Dy të tjerë u plagosën rëndë.

Një i dyshuar 28-vjeçar për të cilin policia thotë se është nga Afganistani është arrestuar pas vrasjes. Një person tjetër që ishte dëshmitar i sulmit është mbajtur gjithashtu për t’u marrë në pyetje, por nuk dyshohet për keqbërje.

Ende nuk dihen motivet e sulmit, por policia ka nisur hetimet.

Goditja me thikë ndodhi pak para mesditës në parkun Schöntal pranë qendrës së qytetit.

Policia thotë se nuk ka më asnjë rrezik për publikun pas sulmit. Autori i sulmit kishte tentuar të largohej nga vendi i krimit përmes hekurudhave aty pranë, me kompaninë gjermane hekurudhore Deutsche Bahn që ndaloi përkohësisht trenat në zonë.

Policia në distriktin bavarez të Franconisë së Poshtme ku ndodhet Aschaffenburg po bën thirrje që dëshmitarët e sulmit të dërgojnë foto dhe video të incidentit.

Aschaffenburg shtrihet në pjesën veriore të shtetit gjerman të Bavarisë dhe është më pak se një orë me makinë ose udhëtim me tren nga Frankfurt.

Gjermania është në gatishmëri të lartë pas një sulmi me makinë në një treg Krishtlindjesh në qytetin lindor të Magdeburgut muajin e kaluar, duke lënë të vdekur 6 persona dhe pothuajse 300 të plagosur.

Siguria në hapësirat publike të Gjermanisë është një temë kryesore e debatit përpara zgjedhjeve të parakohshme gjermane më 23 shkurt./DW