Limaj e Pacolli e nisin fushatën në Prishtinë, premtojnë rritje ekonomike 8%

Pacolli: Me qeverisjen NISMA-AKR-PD, 60 mijë vende të reja pune

Në praninë e mijëra qytetarëve, koalicioni Nisma Socialdemokrate, Aleanca Kosova e Re dhe Partia e Drejtësisë ka hapur fushatën elektorale për zgjedhjet e jashtëzakonshme të 6 tetorit.

Kandidati për Kryeministër të Kosovës nga ky koalicion, Fatmir Limaj, iu drejtua të pranishmëve duke thënë se motoja “Bashkë Për Shtetin” do të jetë motoja e fitores së këtyre zgjedhjeve sepse garanton zhvillim të qëndrueshëm dhe prosperitet.

“Ne sigurojmë se ky koalicion do të jetë zëri i popullit të Kosovës, zëri i të rinjëve dhe të rejave. Ne do ti përkrahim të gjitha shtresat e vendit. Ne do të sigurohemi që ky koalicion të jetë zëdhënës në qeverinë e Kosovës për punëtorët që të zbatohet ligji i punës”

Në anën tjetër, kryetari i Partisë së Drejtësisë, Ferid Agani, me mesazhin drejtuar të pranishmëve tha se duke votuar për vlerat sublime të cilat i përmban ky koalicion, qytetari i Kosovës i ofron udhëheqje të denjë vendit të tij.

Gjatë këtij tubimi , presidenti i subjektit AKR, Behgjet Pacolli iu drejtua të pranishmëve me një mesazh të fuqishëm që shpalos vizionin e koalicionit NISMA-AKR-PD.

“Pas 6 Tetorit ne do të sigurojmë qeveri të ndershme dhe me prosperitet. Buxheti i Kosovës do të jetë zhvillimor dhe jo vetëm për shpenzim. Synojmë të kemi rritje ekonomike prej 8% dhe mbi 60 mijë vende të reja pune në sektorin privat”

Ai me këtë mesazh drejtuar të pranishmëve nga Shtetet e Bashkuara të Amerikës, konfirmoi se vendi ynë ka mbështjetjen e SHBA-së dhe tha se synim i AKR-s është që Kosova të jetë anëtare e organizatave të mëdha botërore.

---