Të djathtët, në ofensivë për rishikimin e ligjit të azilit

Deputetët e djathtë, sot, duke vepruar si një komitet i përbashkët kanë paraqitur argumentet e tyre në të mirë të revidimit të ligjit për azilin

Partitë e spektrit të djathtë të përfaqësuara në Parlamentin e Zvicrës kanë nisur të martën një fushatë në favor të iniciativës për rishikimin e Ligjit për Azilin, për të cilin populli i Zvicrës do të dalë në referendum më 9 qershor.

Qëndrimi i partive të djathta është se ligji i rishikuar (revizionuar) i azilit do të jetë një hap përpara në drejtim të funksionimit më të mirë të politikës së azilit në Zvicër. Në këtë kuptim, deputetët e këtyre partive sot, duke vepruar si një komitet i përbashkët kanë paraqitur argumentet e tyre në të mirë të iniciativës.

Deputeti i CVP/PDC-së, Gerhard Pfister ka thënë për mediet në Bernë se problemet në fushë të azilit janë evidente. Por duhet gjetur një rrugë të mesme, që shkon ndërmjet përgjegjshmërisë së politikës dhe reagimit ndaj pakënaqësisë së madhe që mbretëron në popull.

Ndër temat me përparësi që kanë prezantuar përfaqësuesit e të djathtës ka qenë shpejtimi i planifikuar me rishikim, i procedurës së azilit. Ligji i rishikuar i mundëson Qeverisë së Zvicrës që të provojë një fazë testuese të procedurave. Në këtë mënyrë, qeveria do të ketë në dorë njëinstrument të rëndësishëm për të bërë në mënyrë më efikase shqyrtimin e kërkesave të azilit, ka thënë Marianne Streiff nga EVP.

Komiteti për Po rishikimit të ligjit për azilin përshëndet financimet që u jepen kantoneve për programe angazhimi (punësimi të përkohshëm) të azilkërkuesve  dhe për strehim ndaras të azilkërkuesve problematikë. Këto masa do të ndikojnë që popullata e cila jeton në afërsi të qenrave të strehimit të azilkërkuesve të ndjehet më e sigurt. Në Chiasso programet e tilla kishin pasur ndikim pozitiv ka thënë Roberta Pantani nga Lega/TI.

Ndërsa Martin Landolt nga BDP ka thënë se duhet ndarë “shapin prej sheqerit” në kuptimin që të përmirësohet imazhi i azilkërkuesve, respektivisht pranimi i tyre nga ana e popullatës. Sepse, ka thënë ai “Kush i kursen të këqijtë, i dënon të mirët”. 

Komiteti për Po revidimit të ligjit të azilit shprehet po ashtu për heqjen e të drejtës së kërkimit të azilit në përfaqësitë diplomatike të Zvicrës jashtë vendit. Gjithashtu edhe baza për azil për dezertorët e shërimit ushtarak duhet të hiqet.

Zvicra është vendi i vetëm në Evropë dhe ndër të vetmit në botë që deri tash ka pranuar paraqitjen për azil në përfaqësitë e saj diplomatike, ka thënë Heinz Brand nga SVP/UDC