Koci e dërgon në Kushtetuese çështjen e votimit për presidenten: Afati ishte deri më 6 tetor

Avokati pretendon se votimi për zgjedhjen e presidentes vazhdoi pas mesnatës, duke kërkuar nga Gjykata Kushtetuese të shqyrtojë zbatimin e aktgjykimit të saj.

Avokati Arianit Koci ka njoftuar se ka depozituar në Gjykatën Kushtetuese një njoftim për, siç pretendon ai, moszbatimin e aktgjykimit në rastet KO256/26 dhe KO258/26, përcjell albinfo.ch.

Koci ka argumentuar se Gjykata Kushtetuese kishte përcaktuar që procedura për zgjedhjen e Presidentit të Kosovës duhej të përfundonte deri më 6 tetor 2026. Sipas tij, votimi në Kuvend ka vazhduar edhe pas mesnatës.

Gjykata Kushtetuese kishte konstatuar se afati 60-ditor për zgjedhjen e presidentit kishte nisur më 8 gusht dhe përfundonte më 6 tetor.

Duke iu referuar nenit 226 të aktgjykimit, Koci ka thënë se mosrespektimi i këtij afati, sipas interpretimit të tij, sjell pasoja juridike, përfshirë shpërndarjen e Kuvendit.

“Vendimet e Gjykatës Kushtetuese janë të detyrueshme. Pa zbatimin e tyre, nuk ka shtet e shoqëri”, ka deklaruar Koci.

Tashmë mbetet që Gjykata Kushtetuese ta shqyrtojë njoftimin e dorëzuar dhe të përcaktojë nëse ka pasur moszbatim të aktgjykimit të saj./Albinfo.ch

---