Në stadiumin “Fadil Vokrri” në Prishtinë sonte Kosova përballet me Austrinë, ndeshje në të cilën synon tri pikët dhe të rikthehet në garën për kreun e Grupit B3 në Ligën e Kombeve.
“Dardanët” e presin Austrinë në ndeshjen e katërt të këtij edicioni, e cila nis në orën 18:00.
Të dielën e javës që shkoi, Austria triumfoi me rezutat 3:1 ndaj Kosovës në Vjenë.
Gjatë ditës së djeshme, trajneri i Kosovës, Franco Foda, u shpreh se Kosova synon fitoren në ndeshjen e sotme, teksa homologu i tij, Ralf Rangnick kritikoi gjendjen e fushës në stadiumin “Fadil Vokrri”, transmeton albinfo.at.
Përzgjedhësi Rangnick ka paralajmëruar se ndeshja në “Fadil Vokrri” do të jetë më e vështirë sesa përballja e parë në Austri.