Rekord: Mbi 660 mijë dollarë për një fotografi

Ajo tregon një pamje nga një tramvaj në New Orleans ku janë të ulur ndaras, në ulëset e para njerëz të racës së bardhë dhe në ato të fundit – të zinjtë

“Trolley-New Orleans” mban emrin fotografia e autorit amerikan, të lindur në Zvicër,. Robert Frank. Kjo fotografi është shitur me një çmim rekord, 663.750 dollarë në një ankand të në shtëpinë e ankandeve Christie.

Tregtarët e veprave artistike kishin pritur që çmimi i kësaj fotografie të artistit të lindur në vitin 1924, të arrinte deri në 500 mijë dollarë. Një fotografi me motiv të njëjtë, e autorit Frank ishte shitur para pesë vitesh me çmimin po ashtu rekord prej 620 mijë dollarësh.

Dallimi i fotografisë që aktualisht mban rekordin është se kjo e fundit është më e madhe dhe është zhvilluar edhe teknikisht nga vetë Robert Frank. Ajo tregon një skenë përditshmërie në jug të SHBA-së nga viti 1955: në një tramvaj në New Orleans janë të ulur ndaras, në ulëset e para njerëz të racës së bardhë dhe në ato të fundit – të zinjtë.

Fotografia bën pjesë në serinë e Frankut “The Americans”, me të cilën ai qe bërë i famshëm në SHBA nga fundi i viteve pesëdhjetë. Blerës i kësaj fotografie është një koleksionar privat nga SHBA.

Frank ka qenë i biri i një shtetasi gjerman me prejardhe hebrenje, të shpërngulur në Zvicër. Është i lindur në Cyrih dhe në vitin 1945 kishte marrë shtetësinë zvicerane. Ndërsa shteas amerikan është bërë në vitin 1963.