Ministri Agani po qëndron për vizitë zyrtare në Zvicër

Ministri i Shëndetësisë i Republikës së Kosovës, Ferid Agani, po kryeson një delegacion të Ministrisë së Shëndetësisë në një vizitë zyrtare në Zvicër.

Vizita e ministrit Agani ka nisur me një takim në Bernë me Ambasadorin e Republikës së Kosovës në Zvicër, Naim Malaj, për të vazhduar me takime të ndara pune me Paskal Strupler, drejtor gjeneral i Zyrës Federale të Shëndetësisë në Konfederatën Zvicerane, Ambasadorin Kurt Kunz, zëvendësdrejtor gjeneral dhe kryesues i Departamentit për Bashkëpunim me Evropën Lindore në Agjencinë Zviceran për Bashkëpunim Ndërkombëtar (SDC) dhe me zonjen Barbara Buri, anëtare e Bordit të Asociacionit “Solidar”, bëhet e ditur në një njoftim të Ministrisë së Shëndetësisë.

Ministri kosovar i Shëndetësisë, Agani, i njoftoi nikoqirët përkitazi me gjendjen në shëndetësinë kosovare, nevojat prioritare, përgatitjet e bëra për fillimin e reformës gjithëpërfshirëse të sistemit shëndetësor në vend, si dhe nevojën për mbështetjen e këtyre përpjekjeve nga ana e Qeverisë së Zvicrës.

Ministri Agani u përgëzua nga bashkëbiseduesit për vizionin e qartë reformues dhe qasjen e vendosur ndaj ndryshimeve të domosdoshme si dhe u sigurua nga autoritetet shëndetësore zvicerane për mbështetjen e fuqishme të këtyre përpjekjeve reformuese pas miratimit të Ligjit të Shëndetësisë në Kuvendin e Kosovës që pritet të ndodhë deri në fund të muajit shtator.

Gjatë bisedimeve u theksua gatishmëria e plotë e SDC-së dhe e Zyrës Federale të Shëndetësisë për investime substanciale në sistemin e reformuar shëndetësor të vendit, veçanërisht në funksion të themelimit të Fondit publik të sigurimeve shëndetësore, si dhe përmirësimin e infrastrukturës institucionale dhe profesionale të shëndetësisë kosovare.

Gjatë ditës së sotme ministri Agani zhvillon takim me Tuygan Goeker, drejtor i CEMAI në Bazel (i ngarkuar për Evropën Qendrore dhe Perëndimore, Azinë Qendrore, Lindjen e Mesme, Afrikën dhe Afrikën Subkontinentale) për të vazhduar pastaj me një takim me Kryesinë e Kuvendit Shqiptar në Zvicër në Ambasadën e Republikës së Kosovës në Bernë.

Të shtunën, ndërkaq, ministri Agani do ta përmbyllë vizitën e tij me një tribunë me bashkatdhetarët në Lozanë.