OKB-ja konfirmon zyrtarisht vizitën e Ban Ki-Mun në Kosovë

Vizitën e Sekretarit të Përgjithshëm të OKB-së, Ban Ki-mun, në Kosovë e ka konfirmuar edhe Martin Nesirki, zëdhënësi i OKB-së

Ban Ki-mun do të jetë zyrtari i parë i lartë i Kombeve të Bashkuara që e viziton Kosovën, prej shpalljes së pavarësisë, në kuadër të turneut ballkanik.

Siç ka njoftuar zëdhënësi i OKB-së, Martin Nesirki, sekretari i përgjithshëm i OKB-së, Ban Ki-mun, në fund të javës së ardhshme e fillon tunerun nëpër disa vende të Ballkanit, me ç’rast do të qëndroj në Slloveni, Kroaci, Mal të Zi, Serbi, Kosovë dhe Bosnjë.

Gjatë qëndrimit në Prishtinë, Ban do ta vizitoj misionin e Kombeve të Bashkuara në Kosovë dhe do të takohet me zyrtarët e lartë vendës dhe ndërkombëtarë.Pas Kosovës ai do të udhëtoj për në Srebrenicë të Bosnjës, ku forcat e OKB-së i ishin nënshtruar kritikave të ashpra lidhur me dështimin për ta parandaluar masakrën e vitit 1995, kur në Srebrenicë u vranë afro 8 mijë burra e djem myslimanë nga forcat serbe.

Ndërkohë, presidenti serb, Nikoliq, me t’u dhënë lajmi për vizitën e Ban Ki-mun-it në Kosovë ka shprehur pakënaqësi duke thënë se përderisa Kosova nu është anëtare e OKB-së, zyrtarët e organizatës botërore për çështje të Kosovës duhet të flasin meBeogradin.