EULEX-i arrestoi katër shqiptarë te Kroi i Vitakut

Në veri të Mitrovicës policia e EULEX-it arrestoi katër shqiptarë nën dyshimin se vitin e kaluar kishin vrarë serbin Sava Mojsiq.

Rreth 100 pjesëtarë të EULEX-it kanë bastisur të enjten në mëngjes shtëpitë e disa shqiptarëve te Kroi i Vitakut në veri të Mitrovicës.

Burime të Kosovapress-it bëjnë të ditur se më shumë se 20 automjete me pjesëtarë të EULEX-it kanë ndërmarrë një operacion në këtë lagje rreth orës 06:00 të mëngjesit të sotëm, me ç’rast kanë arrestuar 4 shqiptarë, dy nga familja Beci dhe dy anëtarë të familjes Hajdari, si të dyshuar për vrasjen e Sava Mojsiqit që kishte ndodhur vitin e kaluar në këtë lagje.

Sipas këtyre burimeve, aksioni i pjesëtarëve të EULEX-it ka zgjatur rreth tre orë, ndërsa sjellja e tyre gjatë këtij aksioni ka qenë korrekte. Habib Rama, njëri nga pronarët e shtëpisë që ishte bastisur nga policia e EULEX-it, ka konfirmuar sjelljen korrekte të policëve gjatë aksionit, por ka përmendur frikën e fëmijëve që kishin përjetuar për shkak të prezencës së shtuar të policëve në orët e hershme të mëngjesit.

“Nga shtëpia ime nuk kanë arrestuar njeri, por kanë konfiskuar dy kompjuterë, një celular dhe një aparat-kamerë”, ka thënë për Kosovapress Rama.

Në nëntor të vitit të kaluar në lagjen Kroi i Vitakut në veri të Mitrovicës, pati ndodhur një incident, me ç’rast Sava Mojsiq kishte vdekur, ndërsa dy të tjerë po ashtu serbë, njëri prej tyre pjesëtar i Policisë së Kosovës, ishin plagosur.