LDK-ja konteston rezultatet në 6 komuna të Kosovës

Lidhja Demokratike e Kosovës nuk i ka pranuar rezultatet preliminare të publikuara nga KQZ-ja

Kryetari i LDK-së, Isa Mustafa, ka kontestuar rezultatet që ka dhënë Komisionin Qendror i Zgjedhjeve, duke pohuar se nuk është e mundur që Partia Demokratike e Kosovës të ketë një përqindje kaq të lartë.

Sipas tij ky institucion është radhitur në anën e PDK-së, me rezultatet që i publikoi mbrëmë, duke i futur edhe qendrat e votimit të Skënderajt dhe Drenasit, raportojnë mediat në Prishtinë.

Ai deklaroi se nuk do të lejojë që manipuluesit të qeverisin Kosovën, ngase, sipas tij, ata do të manipulojnë edhe me të drejtat e qytetarëve dhe pronat e Kosovës.

Madje, i pari i LDK-së, akuzoi Hashim Thaçin se shkeli rregulloret elektorale dhe rrezikoi sigurinë e qytetarëve, duke e shpallur fitoren me vota të manipuluara.

LDK-ja kontestoi rezultatet në 6 komuna: Malishevë, Shtime, Mitrovicë, Prizren,  Skenderaj e Drenas. Ai deklaroi se i janë vjedhur 50 mijë vota nga PDK-ja.

Megjithëse, LDK-ja do të presë vendimin e PZAP-it dhe atë të KQZ-së, Mustafa tha se ka shikuar edhe mundësinë që ai vetë ta krijojë qeverinë, pasi që një gjë të tillë ia lejon Kushtetuta. Mustafa ka mohuar mundësinë e dhënies së dorëheqjes, tash kur partia e tij nuk doli fituese. Ai tha se nuk ka arsye të jap dorëheqje, kur partia ka pas ngritje.