Prokuroria, shumë shpejt do ta marrë në pyetje ministrin Rikallo

Kryeprokurori Lumezi tha se prokuroria, në bazë të informacioneve të marra nga mediet, ka nisur fazën e hetimeve dhe është duke mbledhur materiale për pretendimet se ministri Rikallo ka abuzuar me qytetarë të Kosovës gjatë luftës.

Kryeprokurori i shtetit, Aleksandër Lumezi, ka deklaruar se ende nuk kanë ngritur aktakuzë për Ministrin e Bujqësisë, Nenad Rikallo, por se janë në fazën e dëgjimeve të dëshmitarëve. Lumezi ka deklaruar se shumë shpejt pritet të merret në pyetje ministri për këto pretendime.

Kryeprokurori Lumezi këto komente i bëri pas  takimit me ministrin e Drejtësisë, Abelard Tahiri. Ai me këtë rast shtoi se prokuroria, në bazë të informacioneve të marra nga mediet, ka nisur fazën e hetimeve dhe është duke mbledhur materiale për pretendimet se ministri Rikallo ka abuzuar me qytetarë të Kosovës gjatë luftës.

Lumezi ka thënë se nga ministri i ri presin përkrahje dhe punë të përbashkët për luftën kundër krimit të organizuar.

Ndërsa ministri Tahiri ka thënë se e ka njoftuar kryeprokurorin e shtetit për ligjet që janë duke i përgatitur e të cilat do të jenë një ndihmës për punën e prokurorive dhe do të ndihmojnë ata në luftën kundër krimit të organizuar.