OSBE: Gratë janë viktima të dhunës në Kosovë

Shifrat zyrtare të policisë tregojnë se të gjitha viktimat e trafikimit me qenie njerëzore në Kosovë janë gra

Gratë janë viktimat më të shpeshta të dhunës dhe një nga grupet më të margjinalizuara në Kosovë, ka thënë shefi i OSBE-së në Kosovë, ambasadori Werner Almhofer, njofton Radio Evropa e Lirë.

Me rastin e 25 nëntorit, Ditës Ndërkombëtare për Eliminimin e Dhunës Ndaj Gruas, Almhofer ka vënë në pah se shifrat zyrtare të policisë tregojnë se të gjitha viktimat e trafikimit me qenie njerëzore në Kosovë janë gra. “Gjatë nëntëmujorit të këtij viti, janë raportuar 620 raste të dhunës në familje, nga të cilat 95 % janë gra.

Dhuna kundër femrave është një pengesë e madhe dhe me ndikim për shoqërinë, që nuk duhet më të tolerohet”, ka thënë Almhofer. Ai u ka bërë thirrje institucioneve të implementojnë Konventën për Eliminimin e të Gjitha Formave të Diskriminimit ndaj Gruas.