Sa janë të sigurta kursimet e qytetarëve?

Limiti i tanishëm i sigurimit të depozitave për një depozitor, person fizik apo juridik, në një banke është 4.000 euro

Afër tre miliardë euro është vlera e kursimeve apo depozitave të qytetarëve në dhjetë bankat komerciale që operojnë në Kosovë, me një normë mesatare të interesit prej rreth një për qind.

Por, sa janë të sigurta këto kursime në rast të likuidimit të ndonjërës prej bankave. Ekspertë për çështje financiare vlerësojnë se depozituesit kosovarë i kanë të siguruara mjetet e tyre përderisa performanca e bankave është dhe do të mbetet e qëndrueshme, raporton “Evropa e Lirë”.

Kurse, disa qytetarë të cilët arrijnë të kursejnë shuma të vogla të mjeteve thonë se kanë siguri, edhe pse nuk kanë informacione se në rast të likuidimit të bankave, kush do t’i kompensonte mjetet e tyre, përcjell albinfo.ch.

Ndryshe, në bazë të Ligjit për sigurimin e depozitave, kompensimi i depozitorëve fillon nëse Banka Qendrore e Republikës së Kosovës, revokon licencën dhe fillon procesin e likuidimit të ndonjë banke.

Fondi i Sigurimit të Depozitave siguron 610 milionë euro depozita të siguruara apo mbi 21 për qind në raport me totalin e depozitave. Limiti i tanishëm i sigurimit të depozitave për një depozitor, person fizik apo juridik, në një banke është 4.000 euro. Ky limit pritet të rritet në 5 mijë euro nga viti i ardhshëm.