Edhe Sinan Bytyqi i thotë ‘Po’ Kosovës

“Faleminderit për gjithçka Austria, por vendimi im është të luaj për vendlindjen time, Kosovën”, ka shkruar futbollisti i Manchester Cityt në “Facebook”

Pas Milot Rashicës, Alban Mehës dhe Herolind Shalës edhe Sinan Bytyqi e ka konfirmuar se do të jetë pjesë e Përfaqësueses së Kosovës, shkruan albinfo.ch.

Talenti i madh i Manchester Cityt, i cili deri më tani ka përfaqësuar Austrinë, do ta vesh fanellën e Përfaqësueses së Kosovës dhe është në hapat e fundit të formalizimit me ekipin e trajnerit Albert Bunjaku. “Faleminderit për gjithçka Austria, por vendimi im është të luaj për vendlindjen time, Kosovën”, ka shkruar futbollisti i Manchester Cityt në “Facebook”.

Sinan Bytyqi është prej vitesh pjesë e City dhe momentalisht po stërvitet me skuadrën e parë bashkë me Bersant Celinën. Deri tani ka luajtur me të gjitha grupmoshat e reja të Austrisë. Ai është mesfushor me tipare sulmuese dhe ofron kualitet për një ekip në formim e sipër si Kosova.

I lindur në Prizren në 15 janar të 1995, ai emigroi shpejt në Austri me familjen, ku nisi dhe hapat e parë të karrierës me ekipin e Karnten. Më pas kaloi në formacionin e parë austriak, para se të bënte një tjetër hap të madh si firma me Admira Vacker, që i dha udhë, kalimit te Manchester City.  Sezonin e fundit Sinan Bytyqi luajti në huazim te Cambur.