Kosova i pret edhe Shaqirin me shokë…

Kosova është duke i pritur edhe futbollistët tjerë shqiptarë që luajnë për Përfaqësuese tjera, si Valon Behrami, Granit Xhaka, Xherdan Shaqiri e Shani Tarashaj të cilët aktivizohen në Përfaqësuesen e Zvicrës

Milot Rashica dhe Alban Meha konfirmuan se do të luajnë për Kosovën, derisa një vendim të tillë e mori edhe mesfushori Herlolind Shala. Të tre ishin në Kombëtaren shqiptare. Vendimet e tyre ngjallën jo pak reagime, shkruan albinfo.ch.

Por, Kosova është duke i pritur edhe futbollistët tjerë shqiptarë që luajnë për Përfaqësuese tjera, si Valon Behrami, Granit Xhaka, Xherdan Shaqiri e Shani Tarashaj të cilët aktivizohen në Përfaqësuesen e Zvicrës.

Përzgjedhësi i Kosovës, Albert Bunjaki pritet t’i bëjë ftesë lojtarëve e më pas kërkesa e tyre do të shqyrtohet në FIFA. Një tjetër futbollist që mund të luajë për Kosovën është edhe Adnan Januzaj.

Kryetari i Federatës së Futbollit të Kosovës, Fadil Vokrri ka përshëndetur vendimin e Rashicës që të luajë për Kosovën. “Rashica ka qenë dhe është në projektin tonë. Është lojtar me të ardhme të ndritur, i cili do të çojë përpara projektet tona”, deklaroi Vokrri.

Ai shtoi se brenda dy ditësh do të dihet gjithçka se cilët futbollistë do të zgjedhin Kosovën.