Valon Berisha mund të luajë për Kosovën

“Nuk e di nëse do të luaj me Kosovën në shtator, por gjithçka mund të ndodhë. Për momentin mund të them se jam pjesë e Kombëtares norvegjeze”, deklaroi Berisha

Mesfushori me tipare sulmuese i Salzburgut, Valon Berisha, është i kënaqur me triumfin në sfidën ndaj Partizanit, derisa ka folur edhe për Kombëtaren shqiptare dhe Kosovën, shkruan albinfo.ch.

“E kemi pasur shumë të vështirë në Elbasan, megjithatë ishim të përgatitur për këtë. Ne jemi një skuadër që kemi kualitete dhe mendoj se kjo e ka bërë diferencën, edhe pse nuk kemi luajtur në 100 për qind të formës sonë. Megjithatë, kemi marrë maksimumin nga kjo përballje”, tha shqiptari, i cili mori edhe 11-metërshin për austriakët.

Në këtë moment, në drejtim të tij kanë vërshuar ofendime nga tifozët e kuq. “I prisja këto ofendime, pasi po luante një shqiptar kundër shqiptarëve”, tha futbollisti, i cili nuk e mohoi mundësinë që në të ardhmen të luajë për Kosovën.

“Nuk e di nëse Kombëtarja e Shqipërisë më ka bërë ftesë, pasi unë kam debutuar që 18 vjeç me atë të Norvegjisë. Nuk e di nëse do të luaj me Kosovën në shtator, por gjithçka mund të ndodhë. Për momentin mund të them se jam pjesë e Kombëtares norvegjeze”, ka mbyllur Berisha në deklaratën e tij.