A do të luajë Shqipëria sot me 11 lojtarët e gdhendur në trupin e një tifozi ?

Se a do të jetë edhe sot që në start kjo njëmbëdhjetëshe historike, i mbetet të vendosë trajnerit de Biasi, i cili  mund të luajë taktikisht e të ndërrojë lojtarët saherë t’i teket, por jo edhe tifozit të „çmendur“ pas kombëtares, Eusedi Guga.

Ai do të paraqitet gjithmonë me të njëjtën skuadër.

Euseid Guga ka gdhendur në trupin tij 11 lojtarët e skuadrës startuese dhe kjo nuk do të ndryshojë asnjëherë, madje as trajneri de Biasi.

„E kisha vendosur“, tregon Eusedi, „në qoftë se një ditë do kualifikohej Shqipëria, do bëja tatuazh gjithë  lojtarët dhe trajnerin“.

Fytyrat e lojtarëve dhe të trajnerit de Biasi, janë dëshmi që nuk shlyhen. Eusedi Guga i ka bërë tatuazh në shpinë menjëherë pas kualifikimit të Shqipërisë në ndeshjen e fundit ndaj Armenisë të fituar me rezultat 3 me 0.

„Në kurrizin tim janë gdhendur tërë lojtarët që luajtën ndeshjen e fundit kualifikuese ndaj Armenisë, më 11 tetor 2015, përveç  Çikalleshit, të cilin e zëvendësova me Armando Sadikun, sepse shënoi golin e tretë“.

Dhe kur të tjerët po festonin kualifikimin e Shqipërisë, Eusedi Guga kishte filluar po atë natë  gdhendjen e 11-shes historike, ai po përjetësonte kualifikimin e kombëtares në një formë që pak kush ka guxim ta bëjë. Trupi i tij po therrej me 15 gjilpëra përnjeherë dhe atë për plot shtatë orë papushim.

Ai nuk e di sa gjilpëra apo therrje ka marrë, por thotë se ditën më të gëzuar të jetës së tij ka përjetuar me dhembje të tmerrshme në trup.

„Sidomos ato dy orët e fundit kanë qenë një torturë e vërtetë“, thekson 28 vjeçari nga Durrësi

„Tërë tatuazhin e kam bërë  brenda natës së kualifikimit. E di që kanë punuar me 15 gjilpëra, me maksimumin e që ekziston. Tatuazhi ka filluar në ora 23 dhe ka mbaruar në ora 6 të mëngjesit, kujton tifozi i Teutës, që është pjesë e grupit „Djemtë e Detit“.

Me Giani de Biasin trajner, Etrit Berishën në portë; Naser Alijin, Lorik Canën, Berat Xhimshitin e Elseid Hysajn, Shqipëria mbron vijën e fundit. Kurse në mesfushë Eusedio ka hedhur Migjen Bashën, Taulant Xhakën, Odise Roshin, Shkëlzen Gashin, Ledjan Memushajn dhe sulmues, Aramando Sadikun, Eusedi Guga do të jetë dëshmia jonë e një kualifikimi historik.