Pro dhe kundër largimit të Shaqirit

Mediumi që Shaqiri ka dhënë këtë intervistë, “Tribune de Geneve”, ka shkruar se nëse anëtarit të Stoke i vije ftesa nga Kosova, dhe nëse e pranon, në Zvicër duhet të respektohet ky vendim

(KEYSTONE/Ennio Leanza)

Deklarata e Xherdan Shaqirit se nëse e fton Kosova të bëhet kapiten i saj ka ngjallur shumë reagime në Zvicër. Shaqiri konsiderohet yll i kësaj Përfaqësuese dhe helvetikët do të humbnin një lojtar të madh, shkruan albinfo.ch.

24-vjeçari që është deklaruar i pakënaqur me hierarkinë e kapitenëve të Zvicra, ka thënë se do të mendohej nëse nga Kosova i vjen një ofertë për t’u bërë kapiten. Largimi eventual i Shaqirit nga Zvicra, do të ishte humbje e madhe për helvetikët, dhe natyrisht prurje e mirëseardhur për Kosovën. Por mediumi që Shaqiri ka dhënë këtë intervistë, “Tribune de Geneve”, ka shkruar se nëse anëtarit të Stoke i vije ftesa nga Kosova, dhe nëse e pranon, në Zvicër duhet të respektohet ky vendim. “Thirrja do t’i vije, me siguri. Xherdan Shaqiri do të përballet me një zgjedhje personale. Dhe në qoftë se ai zgjedh Kosovën, ne duhet ta respektojmë zgjedhjen e tij. Për gjithë ato që ai ia ka sjellë Zvicrës”, shkruan “Tribune de Geneve”.

Pas debateve të shumta që kanë kapluar Zvicrën rreth largimit të mundshëm të Xherdan Shaqirit në Kosovë, kjo për shkak se ai është injoruar nga shiriti i kapitenit, së fundi ka bërë një shkrim edhe prestigjiozja “Luzerner Zeitung”. Ajo e quan dëshirën e Shaqirit si ego të sëmurë, që i bëjnë dëm kombëtares në këto ditë vendimtare. “Ka shenja se Shaqiri është i sëmurë nga egoja, për shkak se trajneri Vladimir Petkoviq nuk e ka nënshkruar atë si zv.kapiten në vend të Granit Xhakës”, shkruan kjo e përditshme.