Zgjedhja e Pacollit president, para Gjykatës Kushtetuese

Në mbledhjen e jashtëzakonshme të Kuvendit, javën e kaluar, Pacolli votoi për Qeverinë pasi kishte filluar t’i rridhte mandati

　

 LDK dhe AAK, pritet që sot dorëzojnë në Gjykatën Kushtetuese ankesën lidhur me shkeljen e Kushtetutës nga presidenti i sapozgjedhur i Kosovës, Behgjet Pacolli.

　

Përveç procedurës, sipas të cilës u zgjodh presidenti më 22 shkurt, e kontestuar jo vetëm nga dy partitë opozite – LDK dhe AAK, por edhe nga kryeparlamentari, Jakup Krasniqi, dhe deputetë të partisë në pushtet – PDK-së, tani presidenti akuzohet edhe për shkelje të vetë Kushtetutës, mbrojtës e roje e të cilës duhej të ishte ai.

　

Por, partia e tretë opozitare, Lëvizja Vetëvendosje është e përmbajtur në ankesën dhe nuk do t’iu bashkohet LDK-së dhe AAK-së.

　

Në mbledhjen e jashtëzakonshme të Kuvendit, javën e kaluar, Pacolli votoi për Qeverinë pasi kishte filluar t’i rridhte mandati, që nisë nga momenti kur bën betimin se do ta respektojë e ruaj atë.

　

Specialistë të të drejtës kushtetuese dhe interpretues të saj pohojnë me siguri se Behgjet Pacolli shkeli Kushtetutën kur votoi për Qeverinë, pasi u zgjodh dhe dha betimin si president.

　

Ndërkohë sot përfundon afati tetëbitësh i dorëzimit të ankesave për rastin Pacolli në Gjykatën Kushtetuese, ndërsa sytë drejt kësaj gjykate i kanë kthyer edhe ICO-ja dhe kryeparlamentari Jakup Krasniqi.　

　

Lidhur me zgjedhjen e Pacollit president sot mediat kosovare, duke u thirr në një analizë të një grupi ekspertësh ndërkombëtarë, shkruajnë se presidenti i ri do të ishte legjitim nëse ende do të ishte në fuqi Korniza Kushtetuese për vetëqeverisje në Kosovë, me të cilën UNMIK-u e administronte vendin para shpalljes së pavarësisë.

　

Në këtë analizë thuhet se ka dallim midis procedurave të zgjedhjes së presidentit që i përcakton Kushtetuta e Kosovës, nga procedurat e Kornizës Kushtetuese, që del të jetë interpretuar në zgjedhjen e Pacollit president.

　

Sipas këtyre ekspertëve, Korniza Kushtetuese e UNMIK-ut ka mundësuar që të mbahet raundi i tretë i votimit edhe vetëm me një kandidat për president, por Kushtetuta Republikës së Kosovës nuk e lejon një gjë të tillë.

　

Ekspertët kanë thënë se të dy ish-presidentët e Kosovës, edhe Fatmir Sejdiu e edhe Ibrahim Rugova kanë ardhur në krye të Kosovës në bazë të Kornizës Kushtetuese, andaj nuk duhet përdorur si procedura krahasuese në rastin e zgjedhjes së Pacollit, i cili do të duhej të zgjidhej me anë të Kushtetutës së Republikës së Kosovës.

---