4 vende të BE-së për kufizimin e ardhjes së emigrantëve

Sipas diplomatëve të BE-së emigrantët e kësaj kategorie janë kryesisht të minoritetit rom

Ministrat e brendshëm të Gjermanisë, Austrisë, Holandës dhe Britanisë së Madhe i kanë bërë thirrje Brukselit, të jetë më i ashpër ndaj emigracionit të varfërisë nga vendet tjera anëtare të BE-së duke shprehur drojën për rrezikun që po i kanoset sistemeve sociale në vendet e tyre.

“Ky lloj i emigracionit rrezikon qëllimin tonë të përbashkët për të promovuar lëvizjen evropiane të qytetarëve “, thuhet në një letër të adresuar Komisionit Evropian nga katër ministrat e brendshëm të BE-së, transmeton agjencia e lajmeve AFP. Një zëdhënës i Komisionit Evropian e ka pranuar marrjen e letrës të nënshkruar nga katër ministrat.

Një kërkesë e tillë vjen nga presioni i komunave në vendet anëtare të BE-së në lidhje me rastet në rritje të emigrantëve që vijnë sidomos nga vendet e varfra si Rumania dhe Bullgaria, e të cilët aplikojnë për përfitime sociale në Gjermani.

Sipas Ministrit të Punëve të Brendshme të Gjermanisë një fluks i tillë ka krijuar “harxhime të konsiderueshme shtesë” për sistemet sociale të vendeve të tyre duke përfshirë shërbimet në arsimim, kujdesin shëndetësor dhe të akomodimit.

Katër këto vende të BE-së janë duke i bërë thirrje të Irlandës për të vënë këtë çështje në agjendën e takimit të ministrave të brendshëm të BE-së, që do të mbahet në qershor.

Ministri i Brendshëm i Gjermanisë gjithashtu u bëri thirrje vendeve të origjinës të emigrantëve për të përmirësuar kushtet e jetesës dhe integrimin e tyre në shoqëri. Sipas diplomatëve të BE-së emigrantët e kësaj kategorie janë kryesisht të minoritetit rom.

Edhe në fillim të marsit, katër ministrat e brendshëm u takuan në Bruksel për një diskutim informal për emigracionin e varfërisë. Pastaj ata i bënë thirrje Komisionit të BE-së për të trajtuar seriozisht problemin me emigrantët që vijnë nga vendet tjera anëtare të BE-së.

Por, kërkesat e tyre nuk u morën parasysh nga komisionerja e BE-së, Cecilia Malmström.