USAID ka ndihmuar Kosovën me 640 milionë dollarë

"Ne jemi krenarë që jemi partnerët tuaj në përpjekjet tuaja për të realizuar këtë të ardhme", ka thënë Azza El-Abd

Që nga vitit 1999, USAID e ka ndihmuar Kosovën me 640 milionë dollarë, që janë përdorur për ta përmirësuar mirëqenien e qytetarëve.

Ushtruesja e detyrës së drejtoreshës së USAID-it në Kosovë, Azza El-Abd ka thënë se USAID-i ka bërë partneritet me Kosovën për të ndihmuar shumë aspekte në zhvillimin e vendit.

Fokusi në fillim ka qenë themelimi i institucioneve kyçe të qeverisë, asistimi në hartimin e Kushtetutës së Kosovës. Më pas USAID ka ndihmuar themelimin e Bankës Qendrore, Trustin e Kursimeve Pensionale në Kosovë dhe Administratën Tatimore.

Ndërkohë USAID-i përkrahë dhënien e përmirësuar të drejtësisë për të gjithë qytetarët dhe vazhdon të punojë me drejtësinë kosovare për t’i bërë gjykatat më efikase, të qasshme dhe transparente.

“Ndërtimi i kombit është punë e vështirë, mirëpo njerëzit e mirë të Kosovës mund të transformojnë këtë komb në një vend modern dhe të suksesshëm me një të ardhme të ndritshme evropiane. Ne jemi krenarë që jemi partnerët tuaj në përpjekjet tuaja për të realizuar këtë të ardhme”, tha Azza El-Abd.