Thaçi bën për vete deputetë të LDK-së dhe djalin e Rugovës

Kryetari i PDK-së, Hashim Thaçi, njëherësh kryeministër në largim, është duke llogaritur edhe në deputetët e LDK-së, për t’i rreshtuar në mazhorancën që pretendon t’i prijë pas përmbylljes së procesit të votimit.

Ende pa u konstituuar përbërja e re e Kuvendit, transferimet e deputetëve po diskutohen dhe llogariten me të madhe nga përfaqësues të ndryshëm politikë.

Nga ky sezon transferesh duket se më së shumti do të pësojë LDK-ja, e cila në sezonin e kaluar kishte punuar shumë për të marrë deputetë nga partitë tjera.

“Thaçi është vënë në gjah pas deputetëve të mundshëm. Deri tash janë katër deputetë potencialë të LDK-së, të cilët kanë thënë po”, ka thënë një burim ndërkombëtarë në kushte anonimiteti për Kohën Ditore.

Nga LDK-ja e Isa Mustafës mund t’i shkëputen disa deputetë për t’u transferuar në një Grup Parlamentar me emrin “Lista Dr. Ibrahim Rugova”, që ishte në listën e AAK-së në zgjedhjet e jashtëzakonshme parlamentare, ku ishte edhe djali i presidentit të ndjerë, Ukë Rugova.

Astrit Haraqija, njëri nga përfaqësuesit e kësaj liste, ka bërë të ditur për Express se deri tani kanë arritur t’i bashkojnë gjashtë deputetë. “Në grupin tonë nuk do të ketë vetëm deputetë që kanë garuar në zgjedhje si anëtarë të ‘Listës Dr. Ibrahim Rugova’, por edhe deputetë nga partitë tjera”, ka thënë Haraqija.