Shqipëria nuk bën të nënvlerësohet

Sipas "ESPN" skuadra e drejtuar nga Gianni de Biasi ka potencialin që të tronditë evenimentin më të rëndësishëm evropian

Foto Ilustrim

Shqipëria është një prej debutueseve në “Euro 2016” dhe një prej skuadrave më pak të kuotuara, por në Francë, kuqezinjtë do ta shesin shtrenjtë “lëkurën”. Ky është edhe opinioni i prestigjiozes “ESPN”, përcjell albinfo.ch, që theksonte se pavarësisht koeficientit 500 që Kombëtarja shqiptare ka për ta fituar turneun dhe gjasat që kjo të ndodhë janë minimale, e sigurt është që përpara se vera të përfundojë, Shqipëria mund të shkaktojë një, apo edhe dy surpriza.

Me gjithë golin e pësuar pas vetëm 56 sekondave lojë në miqësoren ndaj Katarit, sipas “ESPN” skuadra e drejtuar nga Gianni de Biasi ka potencialin që të tronditë evenimentin më të rëndësishëm evropian.

Një përfundim logjik, pas surprizave që Shqipëria ka shkaktuar në rrugën e saj drejt Euro 2016. Nga fitorja e vitit 2014 në Portugali, për të vazhduar me Francën në vitin 2015. Vendi i dytë në Grupin I kualifikues dhe bileta direkte për në turneun në Francë ishin rezultat i një ecurie fantastike.