Shkencëtarët amerikanë ngjallin veshkën e vdekur!

Ky zbulim, nëse do të përpunohet më tutje, mund të shërbejë si metodë e re për zëvendësimin e organeve edhe te njeriu

Shkencëtarët amerikanë ia kanë dalë që veshkët e vdekura të minjve t`i kthejnë në jetë. Për ta realizuar këtë, ata i kanë hequr njëherë nga veshka të gjitha qelizat e gjalla dhe kanë „mbjellur“ një tip të ri qelizash.

Befasia e shkencëtarëve ka qenë e madhe kur, pak ditë më pas kanë vënë re se veshka e re ka prodhuar urinë, si në laborator ashtu dhe në trupin e një miu të gjallë, ku ajo është implantuar më pas si organ për testim.

Ky zbulim, nëse do të përpunohet më tutje, mund të shërbejë si metodë e re për zëvendësimin e organeve edhe te njeriu, shkruan focus.de.

Sipas Harald Ott nga Harvard Medical School „në rast se kjo teknologji do të mund të përshtatet në indet e madhësisë së trupit të njeriut, pacientët që nuk u funksionon veshka dhe janë në pritje të një veshke të dhuruar, ose që nuk ka mundësi t`u transplantohet ajo, teorikisht mund të fitojnë një organ të ri“.