Pse Trump po kërcënon me tarifa?

Nga e marta, tarifat prej 25% do të godasin mallrat kanadeze dhe meksikane që hyjnë në SHBA, me 10% edhe për mallrat kineze. Por pse?

Kanada:

Shtëpia e Bardhë njoftoi të shtunën se tarifat ishin “të nevojshme për t’i mbajtur përgjegjës Kinën, Meksikën dhe Kanadanë për premtimet e tyre për të ndalur shpërndarjen e drogave helmuese në SHBA”.

Trump gjithashtu i ka kërkuar vazhdimisht Kanadasë që të bëhet shteti i 51-të i SHBA-së.

Në platformën e tij “Truth Social”, ai pretendoi se SHBA paguan “qindra miliarda dollarë” për të subvencionuar Kanadanë dhe sugjeroi që “pa këtë subvencion masiv, Kanadaja pushon së ekzistuari si një vend i zbatueshëm”.

“Kanadaja duhet të bëhet shteti ynë i dashur i 51-të. Taksa shumë më të ulëta dhe mbrojtje shumë më e mirë ushtarake për popullin e Kanadasë – DHE JO TARIFA”, shkroi Trump.

Meksika:

Ashtu si me Kanadanë, presidenti amerikan ka deklaruar se droga dhe siguria kufitare qëndrojnë pas tarifës 25% për mallrat meksikane, duke përmendur “kërcënimin e madh të të huajve të paligjshëm dhe drogave vdekjeprurëse që vrasin qytetarët, duke përfshirë fentanil”, shkruan BBC.

Kina:

Gjatë fushatës së tij zgjedhore, Trump paralajmëroi për tarifa deri në 60% për mallrat kineze. Ai ka vendosur 10% tani për tani, por tarifat deri në 25% u vendosën gjatë mandatit të tij të parë.

“Ne do t’i themi Kinës që nëse vazhdoni të dërgoni fentanil në Meksikë ose në ndonjë vend tjetër dhe ai vjen në vendin tonë, ne do t’ju ngarkojmë një tarifë prej 25% për gjithçka që shisni në Shtetet e Bashkuara të Amerikës”, tha republikani.

BE:

Ndërsa kërcënimet ndaj BE-së duken më shumë të lidhura me deficitet tregtare – kjo është kur një vend importon më shumë nga një vend sesa eksporton.

“Ata nuk marrin veturat tona, nuk marrin produktet tona bujqësore, ata nuk marrin pothuajse asgjë dhe ne u marrim gjithçka”, tha Trump.

“Miliona vetura, sasi të jashtëzakonshme ushqimesh dhe produkte bujqësore”, shtoi ai.

 

 

---