Përsëritja e zgjedhjeve, ka filluar kryesisht qetë

Për shkak të prezencës së tepër t të vëzhguesve partiakë janë mbyllur për 45 minuta dy vendvotime në fshatin Zabel i Ulët të Drenasit

Në konferencën e parë për shtyp të KQZ-së është konfirmuar se të gjitha qendrat e votimit në Skenderaj, Drenas e Deçan janë hapur në orën 7 të mëngjesit.

Kryetarja e KQZ-së, Valdete Daka, me këtë rast ka thënë se, veç komunave të përmendura, nga një vendvotim është hapur edhe në Malishevë e Lipjan.

Ndërkaq edhe Koalicioni i OJQ-ve Demokracia në Veprim, ka dalë me konferencë e parë për media lidhur me procesin e rivotimit në 5 komuna. Ajo ka njoftuar se deri në orën 8 të gjitha vendvotimet janë hapur me kohë, përveç vendvotimit 2114b/01r, ku kishte vonesë prej 15 minutave, kjo për shkak te vonesës se komisionarëve.

Përfaqësuesi i këtij koalicioni Kreshnik Basha, ka bërë të ditur se, sipas vëzhguesve, për shkak të prezencës së madhe të vëzhguesve partiak, të cilët refuzonin të lëshonin vendvotimin janë mbyllur për 45 minuta dy vendvotime në fshatin Zabel i Ulët të Drenasit.

Qendra e votimit në Syriganë të Skenderajt (i banuar me serbë) po votohet në shtëpi private e jo në shkollë.

Demokracia në Veprim kësaj radhe ka të angazhuar mbi 500 vëzhgues, nga dy për çdo vendvotim, një nga komunat përkatëse dhe një nga komunat të tjera të vendit.