Pack: Pas bisedimeve teknike, çështje të tjera

Problemet ndërmjet Prishtinës e Beogradit, të cilat mund të zgjidhen në nivel teknik, do të duhej të zgjidheshin

　

Dialogu teknik nuk nënkupton zgjidhjen e çështjeve politike e kushtetuese. Kështu ka thënë Doris Pack, deputete e Parlamentit Evropian, në një intervistë dhënë Radios Evropa e Lirë.

　

Sipas saj, sa i përket ritakimit të delegacioneve të Prishtinës dhe Beogradit, për të vazhduar bisedimet për të ashtuquajtura çështje teknike, fillimisht duhet të ketë një rezultat.

　

“Nuk jam e sigurt nëse ka deri më tani ndonjë rezultat, sepse ekzistojnë probleme teknike. Ju e dini se librat kadastral janë ende në Beograd – gjë që krijon probleme për investime dhe shitjen e pronave… e kështu me radhë. Nuk e di se a është zgjidhur ky problem. Është gjithashtu çështja e lëvizjes së lirë dhe e kufijve – nuk mendoj se është zgjidhur diçka. Mendoj se kanë qenë bisedimet e para, tani do të kemi sërish bisedime dhe vetëm mund të shpresojmë që të dalë diçka nga ato”, ka thënë Pack.

　

Ajo ka thënë se “problemet ndërmjet Prishtinës e Beogradit, të cilat mund të zgjidhen në nivel teknik, do të duhej të zgjidheshin”.

　

Duke i komentuar deklarimet e autoriteteve kosovare të cilat kanë thënë se presin që në përfundim të këtij procesi, pra të dialogut, Kosova të njihet nga Serbia, ajo ka thënë se i gjithë ky proces i dialogut teknik, është keqkuptuar nga kosovarët.

　

“Mendoj se ata kanë keqkuptuar dialogun teknik. Dialogu teknik nuk nënkupton zgjidhjen e çështjeve politike e kushtetuese. Dialogu teknik është një gjë dhe Prishtina do të duhej të ishte e kënaqur nëse arrin rezultatet e nevojshme. Çështjet tjera duhet të zgjidhen me kohë – hap pas hapi”, ka thënë eurodeputetja Pack.

　

Ndërkohë shefi i diplomacisë portugeze Luis Amado, duke folur për dialogun e Beogradit dhe Prishtinës, ka vlerësuar se ky proces në masë të madhe do të influencojë në stabilitetin e rajonit dhe të Evropës në të ardhmen. Sipas tij, Lisbona pret që dinamika e këtij dialogu të jetë shumë konstruktive për qëllimin përfundimtar që Serbia të bëhet anëtare e barabartë e BE-së.

　

Të hënën e ardhshme në Bruksel mbahet raundit i dytë i bisedimeve teknike midis Prishtinës dhe Beogradit, ndërsa delegacionet do të jenë të përfaqësues si edhe të bisedimet e para të drejtpërdrejta, që u mbajtën në ndërtesën e Këshillit të Evropës në Bruksel, më 8 dhe 9 mars.

　

Edhe raundi i dytë do të jetë i mbikëqyrur nga ndërmjetësuesi i dialogut – Robert Cooper, këshilltari politik i përfaqësueses së lartë të BE-së për Politikë të Jashtme dhe Siguri, Catherine Ashton.

　

Nuk është bërë e ditur nëse në raundit e dytë do të merr pjesë edhe ndihmëszëvendësekretari amerikan i Shtetit, Thomas Countryman.

　

---